2026 жылғы ақпан айына Қазақстан бойынша ауа райы болжамы
Консультативтік синоптикалық болжамға сәйкес, 2026 жылғы ақпан айы жылырақ болып, жауын-шашын мөлшері орташа деңгейде болады деп күтіледі.
Еліміздің басым бөлігінде ауаның орташа температурасы климаттық нормадан 1–2° жоғары, ал оңтүстік-шығысында норма шамасында күтіледі. Жауын-шашын республиканың көп бөлігінде климаттық норма шамасында, ал солтүстік-батыс бөлігінде, оңтүстік, оңтүстік-шығыс және шығыс аймақтардың таулы және тау бөктері өңірлерінде нормадан көп болуы мүмкін.
Бірінші онкүндікте температуралық фон:
Республиканың батысында, солтүстік-батысында (Ақтөбе облысы) түнде ауа температурасы 23-28 аязға дейін, күндіз 15-23 аязға дейін төмендейді, онкүндіктің соңында аяз бәсеңдеп, түнде 10-20 аяз, күндіз 0-5 аяз күтіледі;
еліміздің солтүстігінде, орталығында және шығысында түнгі температура 15-25 аяздан 2-10 аязға дейін, күндіз 5-13 аяздан 4 аяз-1 жылыға дейін қысқа уақытқа жоғарылауы күтіледі, содан кейін ауа температурасы қайта төмендеп, түнде 18-28 аязға, күндіз 13-20 аязға дейін жетеді, онкүндікті ең соңында температуралық фонның жоғарылауы күтіледі;
еліміздің оңтүстік-батысында, оңтүстігінде, оңтүстік-шығысында түнгі ауа температурасы 5 аяз-5 жылыдан 3-11 аязға дейін (Қызылорда облысының солтүстігінде 15° аязға дейін), күндіз 3-10 жылыдан 8-17 жылыға дейін ауытқуы күтіледі.
Жалпы ақпан айында батыста, солтүстікте, орталықта және шығыста ең қатты аяздар бірінші және екінші онкүндіктерде күтіледі: түнде 21-30 аязға дейін, шығыстың таулы аймақтарында 35 аязға дейін, күндіз 13-20 аязға дейін төмендеуі күтіледі. Бірінші онкүндіктің ортасында және соңында (еліміздің батысында – басында), сондай-ақ екінші және үшінші онкүндіктердің жекелеген күндерінде күндіз жылымық болуы мүмкін.
Республиканың оңтүстік жартысында ақпан бойы түнгі температура 5 аяз-5 жылыдан 3-15 аязға дейін, күндіз 3-10 жылыдан 8-17 жылыға дейін ауытқуы күтіледі.
Республиканың солтүстік бөлігінде жауын-шашын негізінен қар түрінде, ал оңтүстік-батыста және оңтүстік өңірлерде жаңбыр мен жылбысқы қар түрінде түседі. Тұман, көктайғақ, желдің күшеюі, солтүстікте бұрқасын күтіледі.
