2026 жылғы Қазақстан бойынша қазан айына арналған ауа райы болжам
Қазан айында Қазақстан аумағында ауа райы жылы және жауын-шашын мөлшері климаттық норма шамасында болады деп болжанады.
Қазан айының алғашқы күндерінде еліміздің басым бөлігінде ауа температурасы +15+25°С аралығында болады деп күтіледі. Одан кейін Солтүстік циклонның әсерінен республиканың барлық аумағында жаңбыр және қар түрінде жауын-шашын түседі. Жел күшейіп, оның екпіні 15-28 м/с-қа дейін жетеді. Солтүстік жартысында бұрқасын болуы ықтимал. Арктикалық ауа массаларының енуіне байланысты тұман, көктайғақ құбылыстары және үсік жүруі мүмкін. Ауа температурасы айтарлықтай төмендейді, алайда бұл кезең ұзаққа созылмайды:
елдің батысында, солтүстік-батысында түнде -6+5°С, күндіз +2+11°С- қа дейін;
солтүстігінде, шығысында және орталығында түнде -1-6°С, күндіз 0,+8°С- қа дейін;
республиканың оңтүстігінде және оңтүстік-шығысында түнде 0,+5°С, күндіз +10+15°С, таулы аудандарда түнде -2-10°С, күндіз +5+10°С-қа дейін.
Бірінші онкүндіктің екінші жартысында Орта Азия мен Жерорта теңізінің шығыс жағалауынан жылы ауа массаларының келуіне байланысты еліміздің басым бөлігінде күндізгі ауа температурасы +15+20°С-қа дейін, оңтүстік-батыста және оңтүстік жартысында +18+28°С-қа дейін жоғарылайды.
Қазан айының екінші және үшінші онкүндіктерінде ауа температурасының құбылмалы болуы болжанады:
батыс және солтүстік-батыс өңірлерде түнде +5+12°С-тан -5+5°С-қа дейін, күндіз +18+28°С-тан +10+20°С-қа дейін;
елдің солтүстігінде, орталығында және шығысында түнде +3+8°С-тан -1-8°С-қа дейін, күндіз +15+23°С-тан +3+13°С-қа дейін;
оңтүстік жартысында түнде +5+10°С-тан -3+5°С-қа дейін, күндіз +15+23°С-тан +20+30°С-қа дейін. Кейбір кезеңдерде ауа температурасы түнде -1-6°С, күндіз +10+15°С болады.
Жалпы, қазан айында республиканың басым бөлігінде айлық орташа ауа температурасы климаттық нормадан 1-2°С жоғары, Шығыс Қазақстан облысында, Павлодар және Абай облыстарының солтүстік-шығыс жартысында климаттық норма шамасында болады деп күтіледі. Жауын-шашын мөлшері республиканың басым бөлігінде климаттық нормаға жуық болады деп болжанады.
